Azərbaycan | Rus | English
SAYTDA BU GÜN: İslam bankçılığı davamlı inkişaf amili kimi **** İlham Əliyev: “ İslahatların davam etdirilməsi üçün biz çox ciddi işləməliyik, daim inkişafda, axtarışda olmalıyıq” **** Maliyyə böhranı şəraitində müəssisələrin tətbiq etdiyi strategiyalar **** Vətənpərvər ziyalı **** “Bakcell”dənuşaq şahmat turnirinə növbəti dəstək **** Birinci vitse-prezident Mehriban Əliyeva Rusiya Federasiya Şurasının sədri Valentina Matviyenko ilə görüşüb **** Hava limanında fəaliyyət göstərən “Bakı Taksi Xidməti” qiymətlərdə endirim edib ****
Qəzetin çap variantları
4-10 iyul 2019-cu il
26 (1074)
20 iyun - 3 iyul 2019-cu il
25 (1073)
Q?zetin ?ap variantlar?n?n arxivi

Faydalı linklər   

www.president.az
www.samedzade.az
www.azerbaijan.az
www.meclis.gov.az
www.banker.az
www.aii.az
Siyasət
Azərbaycan Avropanın etibarlı tərəfdaşıdır
Bu fikir Parisdə Azərbaycanın birinci xanımı Mehriban Əliyevanın iştirak etdiyi Beynəlxalq konfransda səslənmişdir

Xəbər verdiyimiz kimi, sentyabrın 16-da Avropa Parlamentinin Parisdəki ofisində “Azərbaycan: Avropanın enerji təhlükəsizliyi üçün strateji tərəfdaş” mövzusunda Beynəlxalq konfrans keçirilmişdir.
Konfransda Azərbaycanın birinci xanımı Mehriban Əliyeva iştirak etmişdir.
Birinci xanım Mehriban Əliyevaya konfransda iştirak etdiyinə görə minnətdarlığını bildirən Parisin 7-ci rayonunun meri, Avropa Parlamentinin üzvü Rəşidə Dati tədbirin əhəmiyyətini vurğuladı. Azərbaycanın Fransa üçün bir çox sahələrdə strateji tərəfdaş olduğunu deyən Rəşidə Dati bildirdi ki, 20 ildir müstəqillik yolu ilə inamla irəliləyən Azərbaycan bu gün beynəlxalq səhnədə xüsusi rola malikdir. Rəşidə Dati dedi ki, neft və qaz ehtiyatları ilə zəngin olan Azərbaycan Avropa İttifaqının enerji sahəsində mühüm tərəfdaşıdır. Parisin 7-ci rayonunun meri qeyd etdi ki, bu konfrans da Azərbaycan-Fransa iqtisadi əməkdaşlığının genişləndirilməsinə həsr edilib. Rəşidə Dati iki ölkə arasındakı münasibətlərin dərinləşməsində Heydər Əliyev Fondunun prezidenti Mehriban xanım Əliyevanın müstəsna xidmətlərindən danışdı.
Azərbaycanın birinci xanımı Mehriban Əliyeva Beynəlxalq konfransda çıxış etdi.


Mehriban xanım Əliyevanın çıxışı


- Hörmətli xanımlar və cənablar!
Əziz dostlar!
Əvvəlcə Avropanın enerji təhlükəsizliyində Azərbaycanın rolunun gücləndirilməsinə həsr olunmuş bu konfransda sizi salamlayır, sizə təşəkkürümü bildirirəm. Mən, həmçinin bugünkü tədbirin təşkilinə verdiyi bütün dəstəyə görə hörmətli dostumuz xanım Rəşidə Datiyə də minnətdarlığımı bildirirəm.
İcazə verin çıxışımın əvvəlində bildirim ki, Azərbaycan hələ 150 il öncə sənaye üsulu ilə neft hasil edən ilk ölkə olub. 1901-ci ildə dünya neftinin 50 faizi bizim ölkədə hasil edilirdi. İlk neft bumu digər əsas iştirakçılarla yanaşı, Nobel qardaşları, Şell-Transport və Rotşild Banking House şirkətlərinin iştirakı ilə baş tutdu. İkinci Dünya müharibəsində Azərbaycan Sovet İttifaqının neft təchizatının ümumi həcminin 70 faizdən çoxunu təkbaşına təmin edirdi və bu, faşizm üzərində Qələbəyə böyük töhfə oldu.
İyirminci əsrin axırlarında müstəqilliyimizi bərpa etdikdən sonra Azərbaycan elə bir investisiya mühiti yaratdı ki, dünyanın bir çox aparıcı enerji şirkətləri neft və qaz sektorumuza sərmayə qoymağa başladılar.
1994-cü ildə dünyanın aparıcı neft şirkətlərindən ibarət konsorsiumla “Əsrin müqaviləsi”ni imzalamaqla Azərbaycan tarixdə ilk dəfə olaraq Xəzər dənizinin resurslarını beynəlxalq aləmə açdı.
Həmin vaxtdan etibarən, Azərbaycan Respublikasının Dövlət Neft Şirkəti 20 müxtəlif ölkəni təmsil edən 53 beynəlxalq enerji şirkəti ilə 32 Pay Bölgüsü Sazişini imzalamışdır. Xarici şirkətlərin Azərbaycanın neft və qaz sektoruna yatırdığı sərmayələrin ümumi həcmi 44 milyard ABŞ dollarına çatır.
Hazırda Azərbaycan gün ərzində təxminən 1 milyon barrel neft və ildə 30 milyard kubmetrə yaxın qaz hasil edir.
Təsdiqlənmiş qaz ehtiyatlarımız 2,2 trilyon kubmetrdən artıqdır. Bu, gələn onilliklər ərzində ölkəmizə beynəlxalq bazarlarda qazın mühüm təchizatçısı olmaq imkanını yaradacaqdır. Azərbaycan, həmçinin enerji nəqli infrastrukturuna sərmayə qoyub. Prioritetlərimizdən biri təchizat marşrutlarının şaxələndirilməsidir. Bu gün 7 neft və qaz kəməri resurslarımızı müxtəlif təchizat marşrutları ilə dünya bazarlarına çıxarır.
Azərbaycan öz enerji təhlükəsizliyini təmin edib və hazırda tərəfdaş ölkələrin enerji təhlükəsizliyinə töhfə verir.
Azərbaycanın əldə etdiyi ən böyük nailiyyətlərdən biri Bakı-Tbilisi-Ceyhan boru kəmərinin tikilməsi idi. O, tarixdə ilk dəfə olaraq Xəzər və Aralıq dənizlərini birləşdirdi. Biz, həmçinin Xəzərin şərq sahilindən Avropa və beynəlxalq bazarlara neft təchizatçıları üçün çıxışın təmin edilməsində tranzit ölkə kimi öz rolumuzu oynayırıq. Biz təchizatda olduğu kimi, tranzitdə də etibarlı ölkəyik.
Digər tarixi nailiyyət qazımızın ixracı üçün dəhliz açmış Cənubi Qafqaz qaz boru kəmərinin tikintisi oldu.
Azərbaycan Avropa üçün etibarlı tərəfdaşdır. Enerji təhlükəsizliyi məsələsinə yanaşmamız ondan ibarətdir ki, enerji resursları ölkələri və xalqları ayırmalı deyil, birləşdirməlidir. Enerji resursları rəqabət və ya toqquşmaya deyil, regional və beynəlxalq əməkdaşlığa xidmət etməlidir. Təchizatçıların, tranzit ölkələrin və istehlakçıların maraqları üst-üstə düşməli və daha çox proqnozlaşdırma və qarşılıqlı faydaya aparmalıdır. Bu, ölkəmizin enerji fəlsəfəsidir.
Avropanın mərkəzi gözəl Paris şəhərində keçirilən bu konfransda mən Fransanın “Total” və “Qaz de Frans” enerji şirkətlərini Xəzər dənizinin Azərbaycan sektorunda yeni “Abşeron” qaz yatağının uğurlu kəşfi münasibətilə təbrik etmək istərdim. Bu hadisə bir neçə gün öncə açıqlandı və yeni yataq Azərbaycanın enerji potensialını, eləcə də Avropanın enerji təhlükəsizliyini gücləndirəcəkdir.
2011-ci il yanvarın 13-də Bakıda Azərbaycan Prezidenti İlham Əliyev və Avropa Komissiyasının sədri Xose Manuel Barrozu tərəfindən “Cənub” qaz dəhlizi ilə bağlı Birgə Bəyannamə imzalandı. Ümidvarıq ki, yaxın zamanlarda Azərbaycan qazı Avropa qaz bazarına çıxarılacaq və Avropa İttifaqı ilə Azərbaycan arasında münasibətlər daha da möhkəmlənəcəkdir.
Mən bütün konfrans iştirakçılarına uğurlar arzulayıram.
Diqqətinizə görə minnətdaram.


X X X


Sonra Fransanın nəqliyyat naziri Tierri Mariani çıxış etdi. Avropa İttifaqının Azərbaycan ilə enerji sahəsində əməkdaşlığı davam etdirməyin vacibliyini vurğulayan nazir Azərbaycanın birinci xanımının bu tədbirdə iştirakından məmnun olduğunu bildirdi. Fransa Milli Assambleyasında Fransa-Azərbaycan parlamentlərarası dostluq qrupunun üzvü kimi dəfələrlə ölkəmizə səfər etdiyini deyən nazir sonuncu səfərində Prezident İlham Əliyev ilə görüşdüyünü qeyd etdi. “Azərbaycan enerji təhlükəsizliyi baxımından regional və beynəlxalq aləmdə mühüm rol oynayır. Azərbaycan Avropanın enerji təhlükəsizliyinin etibarlı təminatçısıdır” - deyən Fransanın nəqliyyat naziri Tierri Mariani belə bir konfransın keçirilməsini vacib hadisə adlandırdı. O dedi ki, Azərbaycanın neft və qaz ehtiyatları ilə zəngin olduğu hamıya məlumdur. Azərbaycanın neft və qaz ehtiyatlarını dünya bazarlarına çıxarmaqda maraqlı olduğunu diqqətə çatdıran nazir dedi ki, bu məsələdə Bakı-Tbilisi-Ceyhan neft kəməri əvəzsiz rol oynayır. Azərbaycanın müstəqilliyini bərpa etdikdən sonra sənayesini modernləşdirərək, sürətlə inkişaf yoluna çıxdığını vurğulayan Fransanın nəqliyyat naziri 2003-cü ildən Prezident İlham Əliyevin rəhbərliyi ilə ölkədə uğurlu siyasi və iqtisadi islahatların həyata keçirildiyini diqqətə çatdırdı.
Daha sonra Azərbaycanın sənaye və energetika naziri Natiq Əliyev çıxış etdi. Azərbaycanda Prezident İlham Əliyevin rəhbərliyi ilə güclü iqtisadi inkişafın müşahidə edildiyini deyən nazir, ölkəmizin zəngin neft və qaz ehtiyatlarına malik olduğunu vurğuladı. Natiq Əliyev son illər ölkəmizdə energetika sahəsində əldə edilən uğurlardan bəhs etdi, ölkəmizin iştirak etdiyi strateji enerji layihələri barədə məlumat verdi.
Tədbirdə Fransanın, o cümlədən Avropanın aparıcı enerji şirkətlərinin rəhbərləri və nümayəndələri iştirak edirdilər.